Lia-loos katak moris ne’e hanesan poezia ida, maibé moris ne’e mós rikusoin boot ida nu’udar grasa ida hosi lalehan nu’udar “Udan-Rahun” ne’ebé turu lahatene loron no kalan, ne’ebé to’o ikus bele deskobre moris ida-nia lala’ok. Nune’, tuir duni dictum latinu ida dehan Gutta Cavat Lapidem Non-Vi Sed Saepe Cadendo [Udanbeen ne’ebé hakturu aan, nia laiha intensaun atu halo kuak fatuk ida, maibé ho ninia hakturuk aan ne’ebe neineik no beibeik ikus mai halo kuak duni fatuk ida]. Hakarak dehan mai ita katak, moris la’ós de’it oportunidade ida ba ita, maibé ida-ne’e prezente murak ida-ne’ebé ita simu gratuitamente hosi Maromak mai ita no ba lalehan no rai. Tanba ne’e, moris ne’e tenke iha prinsipiu, tanba moris ne’e prezisa moris no hamoris beibeik.