Inong. Sada hata alai mansai gok pangantusion na marhadomuan tu si. Ise hita on na tubu tu portibion molo so sian ina? Tangkas do taboto. Songon dalan ma i manungguli rohanta tu natuatuanta lumobi tu inongta be. Andorang so tanunuti manjaha pustaha on, mansai denggan do ra, molo tasunghun boha do barita ni inongta. Sunggulsunggul on tarlumobi ma tu angka hita namarnatuatua do pe saonari. Taringot tu ise do isi ni pustaha on? Tarida do sian judulna. Tangkas do taboto molo hata inong pintor manghonai do tu roha nang ngolunta. Godang ni pangkorhonna ima na so boi tarlupahon. Isarana mulai sian di bortianna do pe hita sahat tu na taboto marroha manang dung balga bahkan nga hasea be. Ini ni buku on songon sada sarita ma taringot tu ngolu siadap ari ni sada ina dohot anakonna. Aha naso diulahon Inong hudoa tu hita? Ra taboto tangkas do aha alusna. Nda diungkithon, didungketdungketi, dohot dipalapalai do sude asal ma hasea gellengna? So adong hata mansohot mangula saleleng mangolu do pe. Sian manogot sahat tu bodari, sai ianakkonna do disarihon. Panghulingna sipalambok simanangi dohot ateate. Holongna so hea marsik. Parrohaonna na sai use uju pe na hurang denggan diula anakkonna, hir ni hodok na so tarapusan, tangiang na so ra marnasae, dohot lan na asing, sian dia i tajalo? Dapot hita di ngolu ni inongta. Songon sada dalan ma pustaha on laho mangingot, marsarita, martaringot tu angka na uli jala na denggan. Ndang pustaha na sala na di tangan mu na on. Godang ni na uli na mansai denggan hangoluhononton marhite isina. Ahut hamu ma angha na denggan sian pustaha on. Baritahon na denggan tu humaliang asa lam godang na manghamauliatehon basabasa ni Debata tu hita marhitehite ngolu ni dainong. Horas!